Azərbaycanın əlverişli iqlimi və münbit torpaqları fındıqçılığın sürətli inkişafına imkan yaradır. Fındıq həm yüksək qida dəyərinə, həm də ixrac potensialına malik məhsuldur və ölkəmizin bir çox bölgələrində geniş becərilir. Müasir aqrotexniki üsulların tətbiqi məhsuldarlığın və keyfiyyətin artırılmasında mühüm rol oynayır.

Fındıq istehsalında əsas problemlərdən biri aflatoksin riskidir. Bu zərərli toksin əsasən düzgün aparılmayan yığım, qurutma, emal və saxlanma prosesləri nəticəsində yaranır. İsti və rütubətli şərait, məhsulun torpaqla təması, kifayət qədər qurudulmaması və anbarlarda uyğun şəraitin olmaması kif göbələklərinin inkişafına səbəb olur. Nəticədə məhsulun keyfiyyəti aşağı düşür, insan sağlamlığı üçün təhlükə yaranır və ixrac zamanı problemlər ortaya çıxır.

Aflatoksinin qarşısını almaq üçün bağın salınmasından başlayaraq bütün mərhələlərdə qaydalara riayət olunmalıdır: düzgün torpaq seçimi, budama, balanslı gübrələmə, vaxtında suvarma, məhsulun torpaqla təmasının qarşısının alınması, tez və düzgün qurutma, təmiz emal, uyğun qablaşdırma və sərin, quru anbar şəraiti. Bu tədbirlər həm məhsuldarlığı artırır, həm də aflatoksin riskini minimuma endirir.

Yeni fındıq bağı salmaq istəyənlər üçün xəstəliklərə və göbələk mənşəli çirklənməyə daha davamlı olan İtaliya mənşəli sortların tingləri tövsiyə olunur. Xüsusilə Tonda di Giffoni və Tonda Romana  ,  Nokkiyone sortları güclü qabıq quruluşu, meyvənin daha gec zədələnməsi, yaxşı havalanan tac forması və rütubətə nisbətən yüksək davamlılığı ilə seçilir. Bu xüsusiyyətlər göbələk inkişafı və aflatoksin yaranma riskini əhəmiyyətli dərəcədə azaldır.

Düzgün aqrotexniki qulluq və davamlı sort seçimi sayəsində həm yüksək keyfiyyətli, ixracyönümlü məhsul əldə etmək, həm də fındıqda aflatoksin problemini minimuma endirmək mümkündür.